羅生門: 芥川龍之介短篇小說選 I (台語翻譯版) | 誠品線上

Lá-sioh-bóng

內容簡介

內容簡介 ★台語翻譯頭一本！鬼才芥川龍之介，人生哲學短篇精選★讀台文當時行：適合中學生佮台語初學者的文學讀本★８篇攏有譯者專文導讀，開破芥川流的文學底蒂和時代意義★台文審定：鄭順聰★台文校對：董育儒⚫︎毋管是烏暗，抑是光明，攏是人性。上蓋重要的，就是做一个正直的人。落雨暝，衰敗稀微的京都城，一个下人咧揣覕雨過暝的所在。無疑佇羅生門的樓頂懸，拄著掣死人頭毛的老阿婆，予伊對「欲餓死？抑是欲做賊」的難題，無閣躊躇矣⋯⋯掛意家己彼支長鼻仔的和尚；看輕查某𡢃的讀冊人；想欲脫離地獄煞無慈悲心腸的大賊頭；對未來茫茫渺渺的囡仔；做仙較輸做人的杜子春；代誌亂操操捎無摠頭、毋知真相到底是啥的「竹林內」⋯⋯芥川高山疊疊山，小說幻海海底海——善抑是惡，孤孀或溫柔，字字句句帶思量。文體變化萬千，各種人物都有，掠世相來雕琢，將社會的現實炤光。本書收錄〈鼻仔〉、〈蜘蛛的絲〉、〈羅生門〉、〈竹林內〉、〈柑仔〉、〈台車〉、〈淮山糜〉、〈杜子春〉總共８篇故事。⚫︎可另購有聲書「經典文學tsiânn好聽：《羅生門：芥川龍之介短篇小說選Ｉ》」：聲音演出◎義興閣掌中劇團第四代主演王凱生Ông Khái-sing1989年出世，「義興閣掌中劇團」第四代主演兼音樂設計，是偶戲藝術家、音樂創作者，同時迒到劇場音樂設計、燈光設計和舞台監督。新創「布袋戲搖滾音樂劇」之表演形式，得著第九、十屆偶戲金掌獎「最佳配樂音效獎」，入圍第十五屆台灣原創流行音樂大獎「河洛語組」。開創歷史上頭一个以布袋戲為主的Podcast「布袋戲，講予恁聽」，拚勢楦闊布袋戲的各種可能，向望予台語文化湠予遠遠。 這幾年的代表作品：義興閣掌中劇團《天堂客棧》、《隱藏的冤家》、《情－掌中家族》、《GG冒險野郎》、《家事修理會社》；真雲林閣掌中劇團《兩隻老虎》、《汪洋中的一條船》；阮劇團《大路：七天》、《釣蝦場的十日談》；同黨劇團《上帝公的香火袋》；不可無料劇場《老池攝交場－尬游派對》、《玉面》、《一個公務員的誕生》等。

作者介紹

作者介紹 芥川龍之介 あくたがわ りゅうのすけAkutagawa Ryūnosuke, 1892-1927本名新原龍之介，明治二十五年（1892）佇東京的京橋區出生，因阿母精神出問題，過予阿舅做囝，改姓做芥川龍之介。自細漢就興看冊，讀遍國內外的文學作品。高中到大學時，和同學像菊池寬、久米正雄做伙參詳互相鼓舞，積極參加文藝活動。二十四歲發表小說〈鼻仔〉，受著夏目漱石欣賞、牽成，正式行入文壇。芥川的創作大部份是短篇小說，一世人寫欲四百篇遐濟。題材有古典文學、傳說、社會現象、古早時和現代生活，討論人生、社會、藝術、思想、文化各種問題。和志賀直哉同齊夆號做大正文學的代表，佮夏目漱石、森鷗外列做日本近代文學三大作家。昭和二年（1927），芥川自盡，享年三十五歲。為紀念伊的成就，菊池寬佇《文藝春秋》設立「芥川獎」，是日本純文學界上重要的榮顯。伊的冊到今有四十幾國的翻譯版本，大導演黑澤明閣共改編拍做電影《羅生門》，轟動國際。芥川有真濟作品編入日本學校的課本，台灣現行的高中國文教材收錄〈竹藪中〉、〈蜘蛛之絲〉兩篇。譯者 林東榮 Lîm Tong-îng1950年生，台中大肚人，台北工專機械科，交通大學EMBA 3E畢業。出社會後佇在台日本企業服務，因工課需要自學日本話，1976年通過教育部「留學資格語文測驗日語組」。參與各種日本和台灣的技術、業務合作，做過濟濟日語、華語的口譯和字譯。後來獨立創業，從事對日貿易，講日本話佮日本人盤撋五十年。正港台語人，台語講一世人，自認台語袂輸予人。退休了後才發覺家己「毋捌台語文字」，是「台文青盲牛」，下決心學台語文，共失去的母語抾倒轉來，全民台語認證C1高級。退休後，想欲做一項家己有趣味，閣會當回報社會的代誌。揣幾若年，才行到共日本經典小說翻譯做台文的「台譯路」，成做人生最後的主要工課。台文審定｜鄭順聰 Tēnn Sūn-tshong 嘉義民雄人，中山大學中文系、台師大國文研究所出業。 捌任《重現台灣史》主編、《聯合文學》執行主編、教育廣播電台《拍破台語顛倒勇》主持人、公視台語台《HiHi導覽先生》創意發想和台語顧問。 台語作品有：詩集《我就欲來去》；小說《大士爺厚火氣》；散文《台語好日子》、《台語心花開》；繪本《仙化伯的烏金人生》等。 審定過的世界文學經典台譯有：《小王子》、《浪鳥集》、《傲慢佮偏見》等。台文校對｜董育儒Táng Io̍k-jû 1964年生，嘉義縣中埔鄉人，輔仁大學語言學研究所碩士。1984年開始台語研究，參加幾若擺的國際性閩南語研討會並有論文發表，有十外篇台語文捌發表佇數種台語文雜誌頂面；1999年榮獲鄉土語文競賽閩南語教師組音字項第一名；2000年曾擔任閩南語競賽評判佮各地母語教師研習營講師。

產品目錄

產品目錄 作者紹介 Tsok-tsiá siāu-kài鼻仔 Phīnn-á（鼻）蜘蛛的絲 Ti-tu ê si（蜘蛛の糸）羅生門 Lá-sioh-bóng（羅生門）竹林內 Tik-nâ-lāi（藪の中）柑仔 Kam-á（蜜柑）台車 Tâi-tshia（トロッコ）淮山糜 Huâi-san muê（芋粥）杜子春 Tōo Tsú-tshun（杜子春）譯後記 I̍k-āu-kì

商品規格

試閱文字

內文 : 〈羅生門 Lá-sioh-bóng〉

有一工的欲暗仔時，一个下人佇羅生門覕雨。曠闊的門樓下跤，這个查埔人以外，人影是無半个，只有一隻杜猴停佇咧紅漆落甲的大柱頂懸。羅生門𫞼踮朱雀大路，照理講上無嘛愛有兩、三个戴笠仔的查某人，抑是戴軟烏帽仔的查埔人佇遮覕雨才著，這馬干焦這个查埔人爾爾。是按怎呔會按呢咧？這兩、三冬，京都捌有地動、起捲螺仔風、飢荒等等的災害，京都城是變甲衰敗稀微。根據記載，有共佛像、佛具摃摃予歹，共內底的木材，毋管是漆紅漆的，抑是貼金箔仔的、貼銀箔仔的，攏提來排佇路邊做燃火用的柴來賣。規个城市的光景變甲遮爾仔悽慘，修理羅生門這款代誌，呔會有人關心咧！羅生門拋荒甲按呢，也是有好代誌：狐狸來蹛遮，賊仔嘛來矣，是連無人認的死體都提來擲，煞變成一个慣勢。就按呢，日頭若暗落來，只要是人就會感覺誠恐怖，羅生門這箍圍仔就無人敢倚來矣。
相對來講，毋知對佗位來的烏鴉，規大陣規大陣飛來遮。日頭時仔，有幾隻烏鴉咧畫圓箍仔，佇徛咧懸位的吻獸的四箍輾轉是那飛那吼。尤其是羅生門的天頂，予欲落山彼款紅記記的日頭光照著，一隻閣一隻的烏鴉袂輸糝烏麻仔，夆看甲清清楚楚。當然，烏鴉是欲來啄死體肉的──今仔日敢若是較暗矣，無看著半隻烏鴉，只賰一四界的崩塌。佇崩塌的石坎縫，雜草是發甲長lóng-lóng，石坎頂面全一點一點白色的烏鴉屎。下人坐佇七層石坎的上頂層，穿一領洗甲退色的紺色外袍，那咧注意伊正爿喙䫌彼粒大𤶃仔子，人踅神踅神咧看雨佇咧滴滴落。
拄才作者有寫著「下人是咧等雨停」，不而過，下人是等雨停了後，嘛無位通去。平常時仔是會當轉去主人的厝宅，煞毋知，伊四、五工前就去予主人辭頭路矣。頭前嘛有寫過，斯當時的京都是衰敗稀微，下人會去予伊服侍遐濟年的主人刣頭，定著是去予京都這回落坐的時勢來牽連著。所以，寫講「下人是咧等雨停」，應該是愛寫「去予雨縛牢的下人，無位通去，毋知是欲按怎」，毋才較合意。而且今仔日的天氣，是加減有影響著這个平安朝下人的感傷。雨是對申時開始落，到今猶是一點仔欲停的勢都無。現此時，下人該當愛煩惱明仔載欲按怎過──抑就是講，這款進無步、退無路是欲按怎解決？就按呢，想來想去捎無摠頭，朱雀大路拄才開始落的雨聲，伊才會敢若無聽著、閣敢若有聽著。
雨共羅生門包牢牢，對遠遠傳來「tsa̍h」的雨聲。欲暗仔的烏陰天沓沓仔罩落來，攑頭看起去門樓的厝頂斜斜吐出來的厝脊，烏雲一重一重都共罩牢咧矣。
想欲解決這時的進無路退無步，就袂當揀手段。若準欲揀手段，落尾干焦會餓死佇咧塗牆跤或者死路旁，死體就夆拖來羅生門，像狗仔按呢凊凊彩彩就夆擲掉。若準無欲揀手段──這是下人的想法，才會頭犁犁佇咧仝一條路來回思量，到尾仔來到現此時的這款地步。不而過，這个「若準」終其尾嘛是干焦「若準」爾爾，下人雖然是肯定「莫揀手段」這个想法，若是欲予這个「若準」有一个結局，以後佇只有選擇「做賊仔以外無別步」的時陣，伊只是會積極tik共肯定爾爾，就是無彼个勇氣去做。
下人拍一个大咳啾，紲落來是真食力徛起來。欲暗仔時的京都是冷甲需要火熥的季節矣，風敢若是佮烏暗講通和，全然無客氣吹對門柱的中間迵過去。停佇紅漆大柱的彼隻杜猴，毋知走去佗位矣？
下人那勼頷頸，那共金黃色內衫頂面所疊的紺色外袍的頷領搝予較懸，對門外的四箍輾轉共看一輾，想講看會當揣著一个通遮風閘雨、予人看袂著，閣通輕輕鬆鬆睏一暝的所在無？伊隨就眼著𬦰起樓頂彼支闊身漆紅漆的樓梯，頂懸若準有人，應該攏是死人。下人穿草鞋的雙跤就踏起去樓梯的上低層，那注意伊紮佇褲頭的武士刀刀殼，就莫予輾落去。
幾分鐘了後，欲𬦰起去羅生門樓頂的闊身樓梯中央，有一个查埔人身軀勼勼若貓仔，共喘氣聲忍牢咧，佇咧斟酌頂懸的動靜。自樓頂炤（tshiō）過來的微微光線，照著彼查埔人的喙䫌，短短的喙鬚，喙䫌有一粒孵膿（pū-lâng）的紅𤶃仔子。下人自頭就斷定樓頂是干焦有死人爾爾，樓梯閣𬦰兩、三層了後，看著樓頂有人咧點火，火敢若咧振動徙來徙去。這就是彼个搖振動的濁濁黃色光，炤著全是蜘蛛網的天篷反射出來的，予伊知影有人佇遐。這个落雨暝，會佇羅生門樓頂點火的，應該毋是一般人物。
下人若像蟮尪仔跕跤行（liam-kha-kiânn），𬦰到樓梯的頂懸層，身軀做伊共放予平，干焦共頷頸伸出去，膽膽去相頂懸的動靜⋯⋯

最佳賣點

最佳賣點 : ★台語翻譯頭一本！鬼才芥川龍之介，人生哲學短篇精選
★讀台文當時行：適合中學生佮台語初學者的文學讀本
★８篇攏有譯者專文導讀，開破芥川流的文學底蒂和時代意義
★台文審定：鄭順聰
★台文校對：董育儒

活動

• 1212奇幻禮物節｜全站滿$3,000折300
• 1212奇幻禮物節｜全站滿$1,500折120