銀河鐵道ê暗暝 (台日雙語 附台語朗讀 主題曲QR Code) | 誠品線上

銀河鉄道の夜

內容簡介

內容簡介 日本人上愛ê國民作家宮澤賢治 留予世間ê溫情經典「銀河鉄道の夜」 用台灣話親切轉寫，引tshuā你進入散赤少年ê奇幻故事 一tsuā奇麗夢幻、充滿性命哲想ê銀河之旅，做伙起行 「世界文學台讀少年雙語系列」以建立青少年對在地主體ê認同以及hùn闊ê世界觀為目標，按算thai選各國世界名著，以台文進行忠於原典ê翻譯轉寫，收錄原文雙語出版。透過台灣話閱讀經典文學ê真髓，引tshuā讀者認bat各國無仝時間、空間ê真實面腔kap文化內涵。 本系列第三冊《銀河鐵道ê暗暝》（原文：銀河鉄道の夜）是日本國民作家宮澤賢治（1986~1933）猶未赴完成ê代表作，後代人bat以動畫、電影、音樂劇、天文劇場再現ê重要著作。Leh講孤單散赤ê少年gín-á石邦尼，無意中坐起lih銀河鐵道站ê故事。Uì烏暗中ê hit道光焱，石邦尼會得kap上好ê朋友同齊行向奇幻ê宇宙，hānn跳生死關、走tshuē幸福ê夢幻旅途。是值得大細漢感受體驗ê日本文學。 有聲朗讀，精彩試聽：https: youtu.be XB1eSPMqcfc 【本書特色】 1. 世界文學經典「銀河鉄道の夜」（華譯：銀河鐵道之夜）頭一擺台日對譯，日本國民作家宮澤賢治名作，展現奇幻ê宇宙世界kap生死感動ê友情故事。 2. 附台語有聲朗讀、主題曲演唱QRcode，配合故事情境ê精彩配樂，閱讀對照無負擔，台日學習真利便。 3. 精彩插圖表現主角性格kah故事情節、硬精裝典藏。 【名家推薦】 趙順文 前國立台灣大學日本語文學系教授 徐興慶 中國文化大學前校長．東吳大學端木愷校長講座教授 張文薰 國立台灣大學台灣文學研究所副教授兼所長 羅濟立 東吳大學日本語文學系教授兼主任 楊素霞 國立政治大學日本語文學系教授 呂美親 國立台灣師範大學台灣語文學系助理教授 出版贊助── 天母扶輪社、北區扶輪社、明德扶輪社 至善扶輪社、天和扶輪社、天欣扶輪社

作者介紹

作者介紹 陳麗君計畫主編｜陳麗君國立成功大學台灣文學系教授。新營人。專長領域是台灣原住民、新住民、台語族群等跨族群、語言ê社會語言學現象kap教育政策研究。編著《台語ABC真趣味》、《台語拍通關》、《亞洲婚姻移民女性》、《新移民、女性、母語ê社會語言學》等專書。鄭打麵插畫｜鄭打麵國立臺灣藝術大學視覺傳達設計系畢業，gâu畫ang-á圖，插圖mā足內行，是一个無拘無束ê自由創作家。半暝á翻點目睭iáu-koh金khok-khok，雞未啼suah就ài隨起床tshia-piànn，只要是kap植物、動物相關ê冊lóng足興--ê，做貓á奴才上甘願。IG:dame_cheng有聲朗讀｜馮勝雄、吳宜珊、李建穎、Khó͘ Pōe-bín有聲朗讀｜馮勝雄 ─ 朗讀指導‧學者…等男聲國立台南大學台灣文化研究所畢業，國小老師退休，目前擔任台南大學台語課程兼任講師，指導台語語文競賽。有聲朗讀｜吳宜珊 ─ 石邦尼母…等女聲今年讀成大台文系一年á，佮意看小說，有當時mā gia̍h筆創作，是一个尊敬文學kap想beh和文學談戀愛ê大學生。有聲朗讀｜李建穎 ─ 甘派禮、曾阿利kap少年家台南人，目前讀台南一中，自細漢受臺語朗讀kap字音字形訓練，bat著全國語文競賽臺語字音字形國中、國小組頭名。有聲朗讀｜Khó͘ Pōe-bín ─ 說書、石邦尼…等查埔gín-á聲Pó-táu lâi ê khó͘-koe. Ài liû-lōng ê phāiⁿ-á-kha. Ò-chiu Kok-li̍p Tāi-ha̍k Èng-iōng Gí-giân-ha̍k se̍k-sū.〈Chiâ偷食菜頭粿?!〉ōe-pún kò͘-sū chhòng-chok-chiá. Tâi-gí siaⁿ-kak, ài khòaⁿ bàng-gah, ài siá Pe̍h-ōe-jī. Bô-ài chò Bân.台文潤稿‧校對｜林月娥台文潤稿‧校對｜林月娥嘉義縣水上鄉出世大漢，嫁tī屏東。國立成功大學台文所碩士。國立屏東大學台語課程講師；成大kap教育部台語認證lóng C2專業級。全國語文競賽95年台語即席演說kap 97年台語朗讀lóng第一名。102年教育部閩客語文學獎教師組現代詩〈Hōo紅霞hiàm出帆〉第二名，107年屏東縣閩客原文學獎散文〈吵愛〉社會組第一名。詩文散見《海翁台語文學》、《台文戰線》、《教育部電子報》、高雄歷史博物館ê「高雄小故事」。日文校對｜鵜戸聡（うど・さとし）日文校對｜鵜戸聡（うど・さとし）東京大學綜合文化研究所博士。Bat tiàm鹿兒島大學法文學院擔任副教授，現此時tī明治大學國際日本學院做副教授。編過ê冊有《世界文學ê文學 文學ê世界》（松籟社，2020年）、《批判理論關鍵字 文學理論》（フィルムアート社，2020年）等。台文潤稿‧校對｜吳嘉芬台文潤稿‧校對｜吳嘉芬詩、散文、小說等文類ê台語文創作家。作品集《火種》入選2019年臺南市作家作品集【第九輯】。擔任台江國家公園出版ê繪本影音動畫《小螃蟹遊台江／海和尚遊台江》kap《小水鴨兩個家／水鴨囝兩个家》譯者兼臺語配音指導。目前tī國立臺中教育大學台灣語文學系研究所讀冊。林紀甄編輯助理｜林紀甄國立成功大學台灣文學系畢業本土電子刊物《開講khai-káng》編輯兼專欄作者歌曲演唱｜伊藤佳代、曾薰慧歌曲演唱｜伊藤佳代國立中山大學西灣學院約聘助理教授歌曲演唱｜曾薰慧國立成功大學台灣文學系助理教授鋼琴配樂｜曾士珍鋼琴配樂｜曾士珍國立成功大學通識中心兼任助理教授

產品目錄

產品目錄 序 一 幸福ê未來咱向前行 序 二 榮光台文 百年樹人 序 三 Khiā台灣 看世界 第一章 下晡時ê課 第二章 印版所 第三章 家 第四章 人馬座星祭 第五章 天氣輪之塔 第六章 銀河站 第七章 北十字kap波里歐辛海岸 第八章 掠鳥á--ê 第九章 石邦尼ê車票 第一章 午后の授業 第二章 活版所 第三章 家 第四章 ケンタウル祭の夜 第五章 天気輪の柱 第六章 銀河ステーション 第七章 北十字とプリオシン海岸 第八章 鳥を捕る人 第九章 ジョバンニの切符

商品規格

試閱文字

內文 : 鵜戸　聡　日本明治大学准教授
宮沢賢治（1896–1933）は独特な作家である。また「賢治」ほど読者に偏愛されてきた作家も少ないだろう。盛岡高等農林学校に学んだ若き知識人であり、『銀河鉄道の夜』が理科の授業のシーンで始まるように、理科的な素養に富んだ珍しい作家だった。花鳥風月に代表されるコード化された自然を歌に詠み込んできた日本文学の流れにあって、「金剛石」や「黒曜石」といった鉱物や「蠍座」のような星座を好んで取り上げ、「三角標」という造語を案出するなど、科学知識を種として新しい詩的イメージを育て上げた。
東北の豊かな自然の中で花巻農学校の教諭として農民に深く交わり、また仏教（とりわけ法華経）に篤く帰依した賢治だが、その作品世界は調和一辺倒のユートピアではない。むしろ人間と動物、機械と自然といった異種異類の者たちの遭遇と両者の間の食い違いがそこかしこに隠されている。そこにはまさに「鉄道」や「鉄砲」といったモチーフが体現する「近代」が、破壊を伴って世界を席巻しつつある時代背景があった。それゆえ近年の文学研究においても、例えばポストコロニアリズムやエコクリティシズムの見地から、賢治作品は絶えず読み直されているのである。
童話である『銀河鉄道の夜』は、子どもに読み聞かせることのできる作品であり、またその文章は口語的である。十年にわたって改稿されつつも、作者夭折のため決定稿のない作品でもある（四種の原稿が残されている）。その言葉には、未だ書き尽くされていないところがあり、標準化されていない言葉遣いがある。この賢治の言葉が、日常性を保ちながら文学の言葉としても成熟しつつある台湾語へと翻訳されたのはまことに似つかわしく、台湾語と『銀河鉄道の夜』がともに新たな可能性を開くことになるに違いない。

趙順文　前國立台灣大學日本語文學系教授
吾友成大教授麗君姉雄才大略，培養雙語人材，主編《世界文學》少年版，推出世界文學名作《銀河鉄道の夜》台日雙語新書，tī遮獻上俳句一首推薦兼祝賀「友ありて幸ありて天の川かな（有友情有幸福銀河世界）」。

羅濟立　東吳大學日本語文學系教授兼主任
日本作家宮澤賢治ê著作，充滿美學幻想色彩ê特殊描寫；透過台語媠氣、tuan-tiah ê文字kap聲音ê展現，激出一蕊一蕊美麗、燦爛ê花蕊，值得ta̍k-ke做伙好好á來閱讀kap欣賞。

楊素霞　國立政治大學日本語文學系教授
日本文學大師宮澤賢治眾人呵咾（tsìng-lâng o-ló）ê作品，譯做優美典雅ê台語文，hōo讀者感受tio̍h作品裡ê幻夢kap溫暖，沉醉tī媠氣（suí-khuì） ê台語環境當中。

呂美親　國立台灣師範大學台灣語文學系助理教授
這一千冬內hōo日本人siōng佮意ê作家，tshuā ta̍k-ke走揣幸福、起造幸福ê宮澤賢治。這陣，咱總算ē-tàng用台語tuè宮澤賢治繼續tī性命ê銀河中間，重新經驗悲喜，hùn闊ē-tàng tsiânn做幸福ê力量。

序一
幸福ê未來咱向前行

　　《銀河鐵道ê暗暝》（原文：銀河鉄道の夜）是日本國民作家宮澤賢治(1986~1933)iáu bē-hù完成ê代表作，後代人bat以動畫、電影、音樂劇、天文劇場來呈現tsit phō作品。Koh親像《銀河鉄道999》、藤子・F・不二雄ê《ドラえもんのび太と銀河超特急》、宮崎駿ê《神隱少女（千と千尋の神隠し）》等等tsē-tsē日本國寶級ê á-nī-mé（動漫）作品、音樂創作lóng有受著啟發kap影響。作者在生無名，全奉獻心力tī指導農民農業，同時mā規心teh創作兒童文學kap新詩。銀河鐵道tsit phō作品會使講是伊ê宗教思想、宇宙天文關ê再現，mā是伊對土地、農礦業ê熱情以及一世人一步一跤印行踏ê彙集。Uì 1924年ê筆尖初稿，一直到伊過身ê隔轉年才出版，後來koh經過研究人員4 pái改版補闕了後，才成做現此時讀者目睭看著ê生張。
　　《銀河鐵道ê暗暝》故事描述一个內心和生活lóng陷入孤單散赤ê少年gín-á石邦尼，tng伊上mah-tsih ê tshit-thô伴甘派禮kap其他ê gín-á伴穿新衫kuānn水燈樂暢歡喜過星祭節ê時陣，石邦尼suah著ài為破病ê阿母趕去無局稀微ê牧場提牛奶，也因為按呢，無張持suah坐起lih駛往銀河ê夜快車。Uì烏暗中ê hit道光iānn hōo石邦尼會得kap上好ê朋友同齊行向奇幻ê宇宙，hānn跳生死關、走tshuē認清幸福真意ê旅途。本成孤單無伴ê心，總算得著救贖。到底幸福是啥--leh？故事內底作者透過11 pái ê「幸福問答」，tuè著故事ê展開，使得tsit个內心充滿孤單、giâu疑、氣苦ê少年gín-á，tsia--ê無完整ê性命情感，tī銀河清透金光的水流溪，ta̍uh-ta̍uh-á hōo洗清氣。啊未來就親像西北雨落過ê hit板虹，就算講無kài完美，m̄-koh充滿著希望。
　　阮teh翻譯tsit篇作品ê時，阮ê人生旅程也拄好tshiāng著選擇ê交叉路口、無主張、孤單ê心境，tng翻譯過程漸漸行到尾站ê時，阮也tshuē著「kā ka-kī放下」ê領悟。Tsit篇作品ê台、日雙語讀本會得順利出版，ài感謝是我ê學生mā算是我ê老師ê友志林月娥老師、以及台文ê筆花kap笑聲平媠氣ê吳嘉芬老師，多謝恁完全無藏步ê協助，以及鵜戶聰先生鼎力相助，再次感謝！

陳麗君（本冊主編、譯者）

第一章｜下晡時ê課

https://youtu.be/XB1eSPMqcfc

　　「各位同學，恁kám知影tsit个白茫茫、看bē清楚ê物件到底是啥？有人講這ná像一條河川，mā有人講親像是牛奶流過ê痕跡neh！」老師手指吊tī烏枋 hit張大大張ê星座圖，uì頂kuân指到下跤hit條白phú白phú ê銀河問ta̍k-ke。
　　甘派禮（カムパネルラ）先gia̍h手，suà落koh有4、5个人gia̍h手。石邦尼（ジョバンニ）mā想beh gia̍h，suah緊koh kiu倒轉來。伊心內真知hia--ê的確全lóng是天星，m̄知tang時bat tī雜誌讀過。M̄-koh，tsit-tsām-á石邦尼感覺足愛睏，tī教室lóng teh tuh-ku，無閒工讀冊，mā無冊thang好讀，m̄知teh創啥，日子過kah茫茫渺渺。
　　老師ê目睭足金，真緊就相著伊ah。
　　「石邦尼同學。你應該知影honnh？」
　　石邦尼hiông-hiông hiánn一下，khiā 起來了後suah全然無法度回答tsit个問題。坐tī伊頭前ê曾阿利（ザネリ）越頭kā恥笑。石邦尼心臟pho̍k-pho̍k-tsháinn、規面紅kì-kì。老師koh問：「咱若用大支ê千里鏡觀察銀河，銀河大概是啥物款？」
　　石邦尼心內teh想，iáu是天星啊，m̄-koh伊kâng款無法度隨回答出來。
　　老師看會出來伊sió-khuá-á gāi-gio̍h-gāi-gio̍h，就看tuì甘派禮hit pîng講：「按呢，甘派禮同學，你講看māi！」結果本底手gia̍h上緊、上有元氣ê甘派禮，tsín suah tùn-tenn tī hia，尾--á歹勢歹勢khiā起來，kâng款無應kah半句。
　　老師用真意外ê目神看甘派禮，隨講：「按呢好！」老師手ná指星座圖ná問：「Tsit个白phú白phú ê銀河若用大支ê千里鏡斟酌kā看，就會看著tsiâu細粒á ê天星滿滿是。石邦尼，著--bô？」
　　石邦尼tìm頭、面á紅紅紅。M̄知tī tang時石邦尼已經目屎含目墘ah。著，我知，甘派禮當然mā知。有一pái，阮bat做伙tī甘派禮in hi t个博士爸á ê厝裡讀過一本雜誌，內底有寫。M̄-nā 按呢，雜誌看了後，甘派禮koh去冊房mooh一本足大本ê冊，掀開teh紹介銀河hit頁，阮兩个人同齊看一張足大張koh足suí ê圖片，規phiàn背景烏lu-lu，白siak-siak ê點滿滿是。甘派禮當然無可能放bē記得，無隨回答是因為伊知影，我tsit-tsām-á工課uì早起做到暗時，足thiám頭。來學校mā無kap ta̍k-ke tshit-thô，tsham甘派禮mā變kah無啥話thang講。甘派禮同情我、m̄甘我，才會刁工無回答。想到tsia就忍bē-tiâu，感覺ka-kī kap甘派禮平可憐。
　　老師koh繼續講：「所以若準講這銀河是一條溪，hia--ê一粒á一粒ê 細粒星就lóng是溪底ê 細粒石á抑是幼沙á；啊若是kā這當做是一港足大港ê牛奶流過，koh khah成天頂ê河溪，hia--ê天星就親像浮tī頂面ê牛奶球。若按呢溪水就是真空ê光線、有一定ê速度teh流，日頭kap地球tú好浮tī中央。也就是講，咱人mā tuà tī河溪內底。銀河愈深、愈遠ê所在，天星就愈tsē、愈密，m̄才會看起來白phú白phú。來，咱來看tsit个模型。」
　　老師手指hit个té足tsē 金爍爍幼沙á ê大型雙面膨鏡。
　　「銀河ê形體就親像tsit面膨鏡。Tsia--ê每一粒光lóng kap咱ê日頭kâng款是ka-kī發光ê星球。日頭差不多tī tsit个中央，地球就tī tsia附近。請各位同學kā tsit陣想像做暝--時，然後khiā tiàm膨鏡ê中央觀察四周圍ê世界。Tsit pîng ê鏡仁khah薄，ka-na看會著細細粒á ê星光niā-niā；Hit pîng ê鏡仁khah厚，就看會著足tsē光粒，hia--ê離地球khah遠、看起來白phú白phú--ê，就是今á日咱teh講ê銀河。若是想beh知影tsit个膨鏡到底有guā大？有關hit內底ê星球有啥物神奇ê故事？咱後pái自然課才koh來講。Ing暗tú好是銀河祭，ta̍k-ke出去外口詳細看。今á日課就上到tsia，kā冊kap手摺簿á lóng收hōo好。」
　　Siāng時教室tsiâu lóng是合冊桌á蓋、收冊、疊冊ê聲，ta̍k-ke khiā正正、kā老師行禮了後，bē輸鳥á放出籠，隨tsông出教室。

最佳賣點

最佳賣點 : 日本人上愛ê國民作家宮澤賢治
留予世間ê溫情經典「銀河鉄道の夜」
用台灣話親切轉寫，引tshuā你進入散赤少年ê奇幻故事
一tsuā奇麗夢幻、充滿性命哲想ê銀河之旅，做伙起行