我就欲來去: 鄭順聰詩集 (附台語有聲唸讀)
| 作者 | 鄭順聰 |
|---|---|
| 出版社 | 紅螞蟻圖書有限公司 |
| 商品描述 | 我就欲來去: 鄭順聰詩集 (附台語有聲唸讀)：走揣新時代的台文詩，鼻著台語文的新氣味鄭順聰頭一本台語有聲詩集，各界好聲深情獻讀多元跨界跨語作家鄭順聰，找回母語台語靈 |
內容簡介
內容簡介 "
作者介紹
作者介紹 鄭順聰鄭順聰嘉義民雄人，嘉義高中，中山大學中文系，台師大國文研究所出業。捌任《重現台灣史》主編，《聯合文學》執行主編，教育廣播電台《拍破台語顛倒勇》主持人。詩集：《時刻表》，《黑白片中要大笑》。散文：《海邊有夠熱情》，《基隆的氣味》（和鄭栗兒合寫），《台語好日子》，《夜在路的盡頭挽髮》。小說：《家工廠》，《晃遊地》，《大士爺厚火氣》。繪本：《仙化伯的烏金人生》。劇本：歌仔戲《化作北風》（和宋厚寬合寫）。歌詞：嬉班子《赤跤紳士》專輯之〈風吹田洋〉，〈猶原是我〉，〈山苦瓜〉。
產品目錄
產品目錄 十四逝詩（Tsa̍p-sì-tsuā-si） 愛若失去慾望，彼是火烌 路面澹漉漉，樹仔浸霧 我啥物攏無紮 這條路著愛來行落去 你講到遮就好 稻仔青瓏瓏就欲飽穗 恬靜毋是無聲 踮原位守傷久 我的歌，會掠人的心 海沙烏烏 千千萬萬的氣味 葉仔徛黃時 浸佇咧花和果子的氣味內底 我就欲來去 自由詩（Tsū-iû-si） 人攏走佗位去矣？ 光批 鑿 問答 社頭永靖 欲暗 永遠做我的囡仔 哭心疼 彼敢是基隆港邊釣魚仔的人的心情 中洲車頭 舊城城隍廟 水手之門 毋但是月娘 欲無去的物件 水煙 冗冗冗 林中記 霧中意 春中雪 暗淡的厝 阿瑙嘛 翼股 田庄趖 相疊 海平線 多面體的靈魂 定格 傷過大 蜂蝦 城市流動．暝日了然 抾字跤 紀念一个禮拜下晡的意義 袂通 雨的意念 浮洲 上長的暝 無頭神 人類巡航注意事項 結網 頂晡的小城市 上尾一秒 振動 傱暝日 八窓庵 旅中 為著我唱出來的歌 掛念 風塵女 心情字（Sim-tsiânn-jī） #1-49 後錄（Āu-lio̍k）
商品規格
| 書名 / | 我就欲來去: 鄭順聰詩集 (附台語有聲唸讀) |
|---|---|
| 作者 / | 鄭順聰 |
| 簡介 / | 我就欲來去: 鄭順聰詩集 (附台語有聲唸讀)：走揣新時代的台文詩，鼻著台語文的新氣味鄭順聰頭一本台語有聲詩集，各界好聲深情獻讀多元跨界跨語作家鄭順聰，找回母語台語靈 |
| 出版社 / | 紅螞蟻圖書有限公司 |
| ISBN13 / | 9789578019959 |
| ISBN10 / | 9578019955 |
| EAN / | 9789578019959 |
| 誠品26碼 / | 2682098910003 |
| 頁數 / | 144 |
| 注音版 / | 否 |
| 裝訂 / | P:平裝 |
| 語言 / | 1:中文 繁體 |
| 尺寸 / | 15X21CM |
| 級別 / | N:無 |
試閱文字
內文 : 後錄（Āu-lio̍k）
十七歲起蒂我攑筆來寫詩，踮紙面遨遨輾，傍文字消敨我的心情，這條文學的路彎斡來行，有時緊，定定是趖，嘛捌斷去，橫直，就是堅心行落去。
就按呢來到四十歲，出是出兩本詩集矣，見若落筆寫詩，就是感覺略略仔礙虐：意思袂透機，字句硬掙，喙口無利便，我的詩句和我的心啊！就是無法度全然對同。
仝款上卌不惑這時，我蹽落去推展台語，共該當的爸母話講轉來，華轉台改換書寫系統，像轉去十七歲青春時，用詩來拍開文學的門路。拄起步的澀氣和艱難是四常，嘛毋知終其尾會成做啥物形，堅心寫落去就是。
自按呢愈寫愈順、那寫那濟，按2014年年尾到2019年規冬，從到今料想袂著，煞粒積做一本冊的額。我勻仔整理勻仔倒絞來想，較早的華語詩是鬱卒蹊蹺較濟，現此時咱欲來出新時代的台語詩囉，就愛來改換氣味，用樂暢順耳的歌詩攑頭旗。
共規本冊的冊底巡了閣再巡，予我上蓋輕鬆清心的是：我就欲來去，冊名就按呢生來決。
這本詩集通來出版，真多謝濟濟的有志，無論是審定建議、編輯校對、配音配樂、畫圖設計、推薦宣傳……順聰是真感心。
《我就欲來去》共五年額的詩敆做伙，嘛是順聰頭一本台語詩集，是我對台文詩（Tâi-bûn-si）的鑿雕、實驗和楦闊。有三大類，分三大章，嘛是三款形式：
十四逝詩（Tsa̍p-sì-tsuā-si）：是我佇咧翻譯英語詩的過程中，發現Shakespeare彼Sonnet的氣味參台語真成，就那翻那唸那共彼氣口盤入去我的創作，順彼聲說來鋪排，予情愛綿綿，感慨透流，悲傷無底。逐首詩十四逝，計共十四首詩，詩無號名，憑頭就是一首十四逝詩。
自由詩（Tsū-iû-si）：較時行的講法是「新詩」。詩逝欲扯由在人，掠葩無限制，字跤的韻通押嘛會當莫押，共鬥句的束縛敨開，啥款主題、風格、聲韻攏通入來，自由自在，華彩盡展。
心情字（Sim-tsiânn-jī）：2019年十一月初一透早，我一个人坐車去機場，彼時天猶未光，我人眠眠，想欲寫寡物件，眼著窗仔外的滓雲，這散文詩的穎就來發。紲落來，自桃園機場飛到福岡市，按九州的小倉城、門司港咖哩、下關赤間神宮，坐新幹線串過本州的山陽道，參訪廣島原爆和岡山後樂園，閣踅去嚴島神社、岩國錦帶橋、山城尾道和倉敷的水路白牆……按呢八工貼貼，隨時行踏隨時攑手機仔落心情字，我，是寫台文詩的松尾芭蕉。
這三章的三款形式，有三種無仝的鋩角：十四逝詩著一逝一逝，自由詩是一橛一橛，心情字一葩一葩。
台語是我落塗時頭先聽著，嘛是唯一的言語。用母語來寫詩，礙虐無去矣，艱難無去矣，心思和文字是遐爾仔鬥搭，上深的感情就來霧出來，予我真真正正揣著我家己的聲音。
感謝天公伯仔，賜予咱歌詩、目屎和幸福。
2021.09.13
咱對幸福的認捌
是飽滇的色水
或者共無必要的放掉
較贏一綹恬靜
規欉的果子真好
葉仔落了了賰影嘛好
透早，走標出汗後
天光共垃圾相的我洗淨
手扲一本手摺簿仔，筆
共家己掀開
坐火車來去
後一站欲寫的毋是蓋要緊
傍窗仔的景緻
我就欲來去，來去，來去囉
2018.11.04. 長崎大村線電車底
///////////////////////////
問答
啥物是山
塗膨起來
厝咧
你逐工拍開的門
詩是啥貨
短短的字
起戇
窗有斗無玻璃
趖有偌趖
等待出世的等待
直接就來到死亡
連鞭或是拖棚
姑不而將
火車佗出發攏仝款
坐起去就是頭一站
生，家己哭；
死，別人哭。
2015.02.07. 華文版收佇咧《黑白片中要大笑》
///////////////////////////
永遠做我的囡仔
人生是時鐘的齒仔 大漢佮臭老敆做伙
時間行了無聲無說 你踅正爿 我欲落山
手牽手 講故事 做馬騎 睏相倚
講笑詼 揲甲哭 四界傱 揣媽媽
頭拄仔你才出世 捧踮手頭惜命命
連鞭我就抱無法 跤踢落隨變大人
向望你笑微微 永遠是一个囡仔
向望你莫大漢 永遠做我的囡仔
2016.03.17
///////////////////////////
人類巡航注意事項
1
攏佇咧甕仔底，關密密
發射了後，共身軀載遠的是
太空艙，靈魂就交予死亡
2
仝款會爛
用線紩的是千變萬化
皮肉干焦一款太空衫
會大會弓會冗落尾是皺
佗位拍來的神祕訊號
3
蓋大間蓋沉重
向望厝灌燃料好升天
太空船按怎有力猶原
搝袂行
4
去予絞入去絕望的宇宙
一群猴死囡仔當咧凌治
草蜢仔太空人
2018.11.05
///////////////////////////
光猶咧孵，紺色暗暗湠規鉼的天，自車內予我窗仔的框拗彎角度，雲是嗽出來的滓，連鞭有焱焱爍的日頭來洗汰。
# 心情字1
Kng iáu leh pū, khóng-sik àm-àm thuànn kuí phiánn ê thinn, tsū tshia lāi hōo guá thang-á ê khing áu-uan kak-tōo, hûn sī sàu--tshut-lâi ê tái, liâm-mi ū iānn-iānn-sih ê ji̍t-thâu lâi sé-thuā.
# Sim-tsiânn-jī tsi̍t
最佳賣點
最佳賣點 : 走揣新時代的台文詩，鼻著台語文的新氣味
鄭順聰頭一本台語有聲詩集，各界好聲深情獻讀