幻影號的奇航 | 誠品線上

幻影號的奇航

內容簡介

內容簡介 西太平洋正中心 第一島鏈佮第二島鏈之間，一片廣闊的迷航之海 古早華夏佮美日聯盟的兩股力量，混沌踅轉、對接相衝 警察吳昭陽收著指令，愛去日本參加拍賣會走揣一本古冊，嘛為著調查小學同窗的昏倒案件，坐上開往長崎的「幻影號」。調查過程中，伊佮細漢時陣的初戀相拄，嘛熟似一位因為政治迫害離開台灣的研究員。 三人交換資訊佮情報了後，吳昭陽才知影「神祕紅色團體」的存在，嘛了解伊欲揣的古冊是啥物來歷。另外，伊閣發現另外一位小學同窗親像牽涉著昏倒案件，可能佮中國勢力有所牽連。 這時陣，「幻影號」發生奇怪的意外，竟然駛入「烏美加區（Omega Zone）」拋碇去，一陣人落船行入「烏美加環礁」的迷宮，煞來發現閣較驚人的代誌。仝時間，「幻影號」頂面出現一位講家己是滿州人的查埔人。 暗流滾絞，陰謀振動。一件影響全世界的祕密大計畫，欲來發生佇「幻影號」頂面…… ◎專文導讀 「胡長松所使用的小說技法是一種寫實與魔幻交相混雜的寫法，在寫實中有為人所想像不到的魔幻，在為人所想像不到的魔幻中有寫實，交疊出一幅斑斕陸離的圖畫。另外在內容上出現了新科技，並且在整篇小說裡都採用了偵探的寫法，層層揭露隱密中的隱密，所以也是引人入勝的科技偵探小說。」 ──宋澤萊（文學家、國家文藝獎得主） ◎誠心推薦 「胡長松的《幻影號的奇航》是台語文學史上的一个新里程碑，毋管佇故事情節的鋪排、主題寓意的深刻、敘述技巧的運用、新奇巧妙的趣味性，攏真突出。這是一本非常唌人閣傑出的小說。」 ──方耀乾（國立臺中教育大學台灣語文學系特聘教授） 「寫小說，尤其長篇，作者需有冷靜、專注、堅靭及觸類旁通的頭腦，以便將龐雜的知識資料，進行抽絲剝繭般的運作，把可用的素材經由某些技巧統合成一件活生生的故事有機體。胡長松便是具有前述特質的小說家。 這部長篇《幻影號的奇航》是作者胡長松說故事能力的高超展現，「她」（作品）一開始即以喜悅對比悲悽、海洋對比陸地這兩種相映襯的大背景來強化故事起頭的張力，並產生多個懸疑，以激引讀者的好奇，再靠著敘事者（主角吳昭陽）「所寫」的兩種文體分頭並進情節，以迄兩者原本密切關連而合為一體，反映了一系列包含愛情、台灣土豪（交纏黑白兩道的生態）、政治、環保、中共超限戰等主題，背後牽涉國際多國勢力的爭鬥，特別是中國（共）對外的暗黑勢力。小說中，作者對人物、景觀、心理，乃至色彩、味道都有很出色的描寫，使文字顯得精緻動人。」 ──林央敏（台文戰線發行人） 「海洋眼界的曠闊，國際政治的絞滾，情節佈局的玄奇，人物幼路的描寫。胡長松《幻影號的奇航》，展現優質小說的豐沛素養，為台灣文學彩繪新嫣的色水。」 ──陳金順（作家） 「料想袂到，台語長篇小說一下伐就遮爾仔大步，推理、謀殺、間諜、魔幻、愛情、歷史和政治的觸纏，按打狗到長崎，全綴《幻影號的奇航》來盡帆拚。 手路可比帕慕克，《白鯨記》彼款深帶意味，踮胡長松的小說海洋，絞風起湧、千變萬化。 閣較料想袂到的是，故事是遮爾仔好看，一下掀都接載袂牢，直直讀落去……來坐台文的大船，開闊出帆！」 ──鄭順聰（作家、台文推行者） 「定錨於內惟舊部落的日常，卻有著地緣政治縱深，這部小說將二者以記憶、時事及科幻縫了起來，提供了『在地即全球』的想像，同時也終結了島嶼小說界特意迴避中國威脅論的三十年，最後，還以『身為台灣人』的信心，回敬了四分之三世紀前亞細亞的孤兒意識，真的是太精彩了。」 ──魏聰洲（法國社會科學高等學院歷史與文明博士） （按姓名筆畫排序） ◎跨界聯合推薦 尹立（前高雄市政府文化局局長） 伊格言（小說家） 向陽（吳三連獎基金會秘書長） 李長青（詩人） 吳錦發（作家、廣播主持人） 洪明道（小說家） 封德屏（文訊雜誌社社長兼總編輯） 陳允元（國立臺北教育大學台灣文化研究所助理教授） 陳奕齊（台灣基進主席） 楊富閔（小說家） 楊翠（東華大學華文系教授） 廖玉蕙（作家） 廖振富（國立台灣文學館前館長、興大台文所兼任教授） 蔡佩桂（國立高雄師範大學跨領域藝術研究所副教授兼所長） 劉梓潔（作家） （按姓名筆畫排序）

各界推薦

各界推薦 「胡長松的《幻影號的奇航》是台語文學史上的一个新里程碑，毋管佇故事情節的鋪排、主題寓意的深刻、敘述技巧的運用、新奇巧妙的趣味性，攏真突出。這是一本非常唌人閣傑出的小說。」 ──方耀乾（國立臺中教育大學台灣語文學系特聘教授） 「寫小說，尤其長篇，作者需有冷靜、專注、堅靭及觸類旁通的頭腦，以便將龐雜的知識資料，進行抽絲剝繭般的運作，把可用的素材經由某些技巧統合成一件活生生的故事有機體。胡長松便是具有前述特質的小說家。 這部長篇《幻影號的奇航》是作者胡長松說故事能力的高超展現，「她」（作品）一開始即以喜悅對比悲悽、海洋對比陸地這兩種相映襯的大背景來強化故事起頭的張力，並產生多個懸疑，以激引讀者的好奇，再靠著敘事者（主角吳昭陽）「所寫」的兩種文體分頭並進情節，以迄兩者原本密切關連而合為一體，反映了一系列包含愛情、台灣土豪（交纏黑白兩道的生態）、政治、環保、中共超限戰等主題，背後牽涉國際多國勢力的爭鬥，特別是中國（共）對外的暗黑勢力。小說中，作者對人物、景觀、心理，乃至色彩、味道都有很出色的描寫，使文字顯得精緻動人。」 ──林央敏（台文戰線發行人） 「海洋眼界的曠闊，國際政治的絞滾，情節佈局的玄奇，人物幼路的描寫。胡長松《幻影號的奇航》，展現優質小說的豐沛素養，為台灣文學彩繪新嫣的色水。」 ──陳金順（作家） 「料想袂到，台語長篇小說一下伐就遮爾仔大步，推理、謀殺、間諜、魔幻、愛情、歷史和政治的觸纏，按打狗到長崎，全綴《幻影號的奇航》來盡帆拚。 手路可比帕慕克，《白鯨記》彼款深帶意味，踮胡長松的小說海洋，絞風起湧、千變萬化。 閣較料想袂到的是，故事是遮爾仔好看，一下掀都接載袂牢，直直讀落去……來坐台文的大船，開闊出帆！」 ──鄭順聰（作家、台文推行者） 「定錨於內惟舊部落的日常，卻有著地緣政治縱深，這部小說將二者以記憶、時事及科幻縫了起來，提供了『在地即全球』的想像，同時也終結了島嶼小說界特意迴避中國威脅論的三十年，最後，還以『身為台灣人』的信心，回敬了四分之三世紀前亞細亞的孤兒意識，真的是太精彩了。」 ──魏聰洲（法國社會科學高等學院歷史與文明博士） （按姓名筆畫排序） ◎跨界聯合推薦 尹立（前高雄市政府文化局局長） 伊格言（小說家） 向陽（吳三連獎基金會秘書長） 李長青（詩人） 吳錦發（作家、廣播主持人） 洪明道（小說家） 封德屏（文訊雜誌社社長兼總編輯） 陳允元（國立臺北教育大學台灣文化研究所助理教授） 陳奕齊（台灣基進主席） 楊富閔（小說家） 楊翠（東華大學華文系教授） 廖玉蕙（作家） 廖振富（國立台灣文學館前館長、興大台文所兼任教授） 蔡佩桂（國立高雄師範大學跨領域藝術研究所副教授兼所長） 劉梓潔（作家） （按姓名筆畫排序）

作者介紹

作者介紹 胡長松胡長松 高雄市人。第38屆吳三連獎文學獎得主。詩人、小說家、現代台語文學的推動者，現任《台文戰線》雜誌社社長。目前有華語小說《柴山少年安魂曲》、《骷髏酒吧》、台語小說《槍聲》、《燈塔下》、《大港嘴》、《金色島嶼之歌》、《復活的人》、《幻影號的奇航》佮1本台語詩集出版。

產品目錄

產品目錄 目次 導讀｜在紅色勢力滲透下的堅決戰鬥 一本魔幻寫實、科技探險的勝利英雄小說／宋澤萊 自序｜踏話頭／胡長松 第一章 海上重逢 案件筆記1 ｜關係放浪的猴忠仔按怎倒佇舞台頂？ 第二章 天涯歌聲 案件筆記2 ｜關係猴忠仔不幸的幾个風聲 第三章 烏美加環礁出現 案件筆記3 ｜猴忠仔的好牽手秀眉的反應 第四章 時間的吸石 案件筆記4 ｜幾工前劉秀眉所受著的威脅 第五章 歌之神的引𤆬 案件筆記5 ｜根據花雀姊仔所講的這門親成 第六章 寶物的歷史 案件筆記6 ｜秀眉當初對親事的考慮 第七章 駛向環礁 案件筆記7 ｜猴忠仔的病情佮紅蛇的出現 第八章 祕密基地 案件筆記8 ｜彼尾大紅蛇的作為 第九章 基地的祕密 案件筆記9 ｜敢講紅蛇嘛有啥物派系？ 第十章 流亡戰士佮海門通道 案件筆記10 ｜猴忠仔敢有想欲去日本見彼个人？ 第十一章 海上對決 附呈 成做補充的二段事後的調查筆錄

商品規格

試閱文字

內文 : 踏話頭

　　《幻影號的奇航》這篇小說佇2014年10月動筆，2019年底完成，期間有一段時間因為身體的狀況佮工作變動，寫作進度有較慢，對支持我的讀者，我感覺誠歹勢。
　　身為太平洋南島子民的一份子，我一直想欲寫一部佮海洋有關係的小說，所以對前一部小說《復活的人》完成了後無偌久，我就開始進行《幻影號的奇航》的寫作。我設定伊是一部海洋冒險小說，因為自細漢就真愛讀法國小說家凡爾納（Jules Gabriel Verne，1828～1905）的《海底兩萬里》，抑是英國小說家史蒂文森（Robert Lewis Balfour Stevenson，1850～1894）的《金銀島》彼款小說，受怹的作品鼓舞，我希望這部小說仝款有海上的冒險精神，會當予讀者感覺刺激、心適。另外，這篇小說嘛是科幻小說，佇台語寫作，這是上新的試驗。
　　我佇《復活的人》探討較濟咱台灣人佇南島族群、認同佮信仰等方面的「內在」議題，毋過佇這部《幻影號的奇航》，我共閣較濟的篇幅囥佇海洋區域議題，嘛會當講是佮國家安全、外交、軍事有關的「外在」議題頂面。借「幻影號」這隻船，我共敘事的空間徙來到曠闊的西太平洋中心。我主要想欲提醒讀者：徛佇西太平洋的第一島鏈，咱台灣人的未來生存，佮四圍的海洋相連，嘛透過海洋，不時佮海洋四圍的國家，包括日本、美國、中國等國，有真深的牽挽──其中互相有相觸對抗，嘛有合作──佇寫作過程，我慢慢了解，西太平洋的第一島鏈逐國，本身就有歷史命運的共通性，佇台灣東爿、第一島鏈佮第二島鏈之間、水域面積達到500萬平方公里（台灣的140倍大）的菲律賓海，更加是咱台灣東向海洋世界的大門埕。這片東爿的海洋世界，該當才是咱台灣人世界地圖的視野中心──相對用西爿陸地做中心的世界地圖。
　　整體來講，這是一部自頭就佇海上戰鬥的小說──佇軍事、政治、外交、社會、經濟、思想、信仰等等各方面，一直有海洋世界佮陸地世界兩個陣營的戰鬥。戰鬥，發生佇故事的船頂，發生佇太平洋，嘛發生佇台灣社會內部。海有威脅，海嘛有機會，咱台灣人的生存佮生活的品質，佮咱逐世代面對海洋的智慧有關係。我感覺安慰的是，佇小說完成了後的這一兩年，西太平洋的局勢佮第一島鏈的堅固，已經沓沓進入咱台灣人日常的視野。
　　2015年到2019年之間，《幻影號的奇航》佇《台文戰線》雜誌連載，是第一稿，現此時來到你面前的，是2019年12月完成大修改的第二稿。仝款的故事基礎，毋過小說的結構已經佮早期連載的版本無仝。這个改動，是想欲予小說的情節閣較密，嘛閣較有閱讀的趣味。希望你會佮意！

2021/7/20 胡長松 寫佇《幻影號的奇航》初版前

第一章　海上重逢

1

　　一直到今，我猶是無法度理解彼片海域的全部奧妙。
　　老主管豹哥用神祕的目睭看我，伊講：「你可能愛為著你的二个小學老同窗去日本一逝。一个是案件的當事人郭武忠。
另外一个是涂建龍，伊的朋友透過國際刑警網路揣著你，講需
要你的幫贊。伊甚至認為伊的案件佮郭武忠的案件之間有一定
的牽連。」
　　豹哥講的郭武忠，我攏叫伊猴忠仔，是春豐海運的少年頭家，娶一个某真媠，毋過天性猶是風流，日子過甲真飄撇。前一站，伊佇舞台頂唱歌的時雄雄倒落來，佇阮故鄉引起誠大的風波。
　　另外一个是涂建龍，我攏叫伊塗龍。我已經真久無看著伊矣。伊是外地搬來的，較早佮我誠親近，毋過因為一寡代誌，怹兜閣搬走矣，了後我就無閣搪著伊。
　　我尤其會記，涂建龍有一个大阮二歲的迷人阿姊叫做麗雲──豹哥共我講，這逝，我愛坐一隻特別的郵輪去日本。尤其想袂到的，我將會佇郵輪頂懸見著麗雲！
　　雖然已經遐爾久矣，我一聽講會使見著伊，心肝猶是撲撲彩，就親像閣一遍看著我心目中永遠性感、妖嬌的一蕊開透、袂蔫的玫瑰，尤其是……
　　你一定袂使理解，我袂使無想起小學五年我第一遍看著伊的情形。
　　彼工是出大月娘的盈暗，我佇故鄉大埤的岸邊無張持搪著伊。彼个暗暝，我夯阮阿媽咧撈水薸飼雞的仔去偷撈魚仔，麗雲大伐走過，我煞予伊挵一下險險跋入埤裡。
　　毋捌看查某囡仔佇埤墘按呢青狂走的，尤其佇暗暝。
　　「喂！妳是無生目睭喔？」我雙手扞佇一欉水柳，毋過，彼枝阮阿媽咧撈水薸的仔煞交落佇埤裡。
　　伊先是伸手共我的手骨掠咧，紲落，閣共我對強強欲跋落大埤的險境救入伊的胸坎……我的面，雄雄感受著伊胸仔的柔軟。
　　彼是我從來毋捌感受過的女性胸坎，有一个黃梔的芳味。
　　雖然我無跋落大埤，毋過阿媽的仔隨就予水流去矣。
　　「哈哈真歹勢啊！阿弟仔！」伊共我會失禮。
　　「講歹勢就欲準煞喔？我的仔交落去矣啦！我會予阮阿
媽罵死。」
　　「按呢欲按怎？」
　　「我哪會知影欲按怎？」
　　「無，按呢抵你啦！」
　　紲落我猶未赴反應，伊就共伊芳芳有花蜜的厚喙唇，貼佇我的喙䫌頂懸。
　　「喂，我哪會聽著你的心咧撲撲跳哩─按呢，敢會當原諒我矣？阿弟仔！」
　　「我才毋是阿弟仔咧！」
　　「你叫啥物名？幾年矣？」
　　「吳昭陽，五年矣。妳咧？」
　　「涂麗雲。阮兜拄搬來。」
　　然後伊共我講，大埤閣較過彼頭，有一岫貓仔拄出世。伊問我敢欲看覓咧。我講好。閣紲落伊就共我講，伊嘛是偷走出來的，袂使予怹老爸發現。因為怹老爸無允伊盈暗出來，伊是暗暗旋出來的。伊講怹兜就是大埤的邊仔彼間咧飼大隻鬥犬的。伊更加袂使予伊的老爸知影伊是來看遐貓仔。
　　「我討厭阮老爸飼大隻狗去相觸。」伊按呢講。
　　「毋過討厭閣會使按怎？妳是伊的查某囝啊！」我想欲激一个較大漢的囡仔講話的氣口，毋過一定真詼諧。
　　「伊若閣飼彼款狗，有一日我會離家出走！」
　　我閣會記，秋天的月娘共大埤照做一片的銀色水泱。中秋已經過的秋天，我鼻著的，是附近菱角田的爛塗味，閣有伊身軀黃梔仔的芳。我行佇伊的後壁，心肝撲撲彩。佇大埤較倚近縱貫鐵路的彼欉佳冬下跤，誠實有一岫貓仔咧叫。
　　阮做伙踞咧看。拄好火車來矣。火車轟轟轟駛過埤岸的鐵枝路，瞪目的火車燈耀佇伊的頭毛佮伊棉質薄薄的頂懸衫。我敢若對伊的薄衫看著伊的頷頸仔根、胸掛骨、佮伊佇我的頭殼內敢若充滿色慾的兩粒圓滾滾的奶仔，伊……
　　塗龍的阿姊麗雲，大阮二歲，彼陣咧讀初中。伊有活踜踜
的兩蕊目睭、厚厚的喙唇佮懸phok-phok 的芳胸……
　　我按怎嘛想未到，我將會閣搪著伊。

2

　　「幻影號」是仿17 世紀西歐帆船起造的現代帆船，佇南洋佮東北亞各港口之間旅行。伊來的時，規个港口佇海的風聲裡振動、鬧熱起來。這隻船並古早的帆船閣較大隻，攏總有四枝桅柱、七面大帆佮七層的客艙，船底聽講嘛有現代機械動力，毋過對外表看袂出來。對外表看，伊鐵殼漆仿柴紋的船身親像是對四百年前的印度洋駛來的。有水手共我講伊是對古早荷蘭的「皮那斯（Pinnace）」遠洋船的型式發展來的，船頭
有半甲板，船首尖尖翹翹伸出去，船尾是四角形的懸懸尾樓。尤其特別的是船的第二層甲板，刁工囥彼个時代的古砲，砲管向船邊的砲孔伸出來。這隻「幻影號」是日本籍某國際郵輪公司的船，船頂有一寡收藏品，本底佇各港口巡航、提供遊客上船參觀，到最近才開始有載客的行程。伊前一站對南洋的某一个港口來，歇佇打狗三工，閣來就欲往長崎去，這逝是打狗、長崎之間的首航。
　　雖然我嘛捌有幾月日去佇日本受訓，日語會通，毋過自警官學校卒業到今，我真少搪著這呢特殊的任務。豹哥講，日本彼爿的拍賣會，會有一本古冊《寬永懺悔錄》，是這遍任務的主要目標。我手頭的資料講，《寬永懺悔錄》是佇日本長崎出島地區出土的新資料，作者是寬永年間荷蘭商館的甲必丹身邊的一个下跤手─除了遮的資料，我知影的非常有限。
　　毋管按怎，我照規定的時間佇打狗二號碼頭上船。
　　六月底的熱人，雖然規个碼頭kheh 滿滿攏是相送佮湊鬧熱的人，毋過旅客的船位其實無真濟，怹共我講，大約干焦三百張船票爾爾，大約攏是台灣的旅客，另外，船頂閣有為著旅遊的效果，穿古早服裝的各國船員佮水手大約四五十人。
　　船準時佇黃昏時刻出海，按算幾日後的盈暗會佇長崎入港。聽講佇長崎入港的時，拄好會赴著一个古代航海節的慶典，這隻船的出現將會是慶典的一个高潮。大約是因為按呢，嘛有一寡旅客刁工穿江戶時代的服裝坐船（怹可能是日本人），予規隻船進入一个特殊的時空內底。我的船票是海景外艙的船票，是2 頂小床的船艙，提供予家己來旅遊的男性旅客。船艙真狹掙，翕閣溼，閣有一个臭氆味，無人蹛會稠，所以出航晉前，規隻船的人攏來佇甲板。
　　我共手架佇甲板的欄杆，予海風吹佇我的面。起帆的時，水手透過真濟索仔咧控制風帆，予帆順風勢漲甲飽滇，成做迷人的曲面。然後，「幻影號」就佇湧聲佮風帆的帶領裡，向夕陽落海的波浪駛離開打狗港，沓沓仔轉斡向北。當我翻頭，打狗山漸漸成做海平線的一弧暗影，眼前竟然感覺一絲仔離鄉的寂寞。大約就是佇這个時陣，甲板的燈火點著矣，燈火敢若佇風湧裡搖搖顯顯，船頭的所在，毋知當時已經坐兩个穿和服的查某人，一个提「三味線」咧彈，另外彼个，就開嘴吟起來：「汪洋潮來，思君如潮滿，遙見潮那方，或許是君船……」
　　閣無外久，當黃昏的日頭完全沉入大海，海面的天變做柑仔紅的時，船頂放送講會使開始食暗頓，所以甲板頂懸的人沓沓散去，予船員𤆬頭行入船艙的餐廳。彼間船頂餐廳的門口有一塊屏枋，屏枋頂面用日本「風俗圖（浮世繪）」的風格畫一个穿和服的媠姑娘佮一群真古錐的貓佇櫻花樹跤𨑨迌。當船綴湧起落之間，畫中的櫻花樹親像綴咧搖顯，予畫裡彼个姑娘的面出現一種恬靜閣妖艷的氣質。餐廳的裝潢看起來親像一間大間的日本料理店，柴的椅桌攏真有歷史，幾落个廚子穿制服徛佇料理檯後壁咧做壽司。我揣一个角落的桌仔坐，叫一份花飛魚的料理佮一鈷清酒，拄才佇船頭彈「三味線」的彼二个查某人嘛入來矣，怹坐佇一个小舞台頂懸，這馬，閣加一个彈手風琴的查埔人。怹三个人開始演奏較現代的日本演歌，其中我捌聽過的有〈じょんから女節（輕津民謠女調）〉、〈浪花節だよ人生は（浪花調的人生）〉佮〈長良川豔歌〉等等，彼是我佮日本朋友佇小酒館定定會唱的歌。彼兩个穿和服的查某人用一種哀豔的聲嗽輪流演唱，毋知是因為歌聲抑是因為海湧所造成船仔的搖顯，予規个餐廳進入一个放鬆閣豔情的氣氛內面。尤其查埔人開始互相用穢涗的聲嗽講話──
　　就佇這个時陣，一个我真面熟的查某人穿無手䘼的青色洋裝，快步行入來，孤一个人坐佇我頭前的座位。雄雄看，親像是對彼塊日本圖的屏枋行出來的女子。
　　「哈！吳昭陽！」伊的聲音熱情、熟透、掌握一切。
　　「喔！涂麗雲！想袂到啊……」我一看著伊，自囡仔時以來的撲撲彩的心跳就控制袂稠，隨閣出現矣。伊所穿的夏天洋裝的V 字領真低，胸前有飽滇的彎曲線條。伊蓬鬆的長頭毛顯出隨意的氣質，掰對倒手爿，垂佇予日頭曝做金麥仔色的胸槽，敢若誠有重量，綴伊喘氣的胸仔輕輕仔騷動。幼秀的下頦收尖，活潑嬌矍的妝容，予伊的兩蕊目睭活踜踜，已經完全成做成熟查某人的迷人目睭。佮囡仔時代尤其無仝的是，伊擦粉蜜色胭脂的厚喙唇珠，映出唌人的色緻。
　　「是也，想袂到。你今嘛是一个有厚肩胛頭的警官矣哩。」
　　「也妳，更加是有風韻的媠姑娘咯。」
　　「哈你的喙舌猶是遐爾仔敢講是無？毋過你更加想袂到的是，你會加入這擺任務，竟然是受我推薦的。」
　　「哦？有聽局裡的前輩講，只是，我真好奇為啥物是我？」
　　「因為我永遠會記得你英雄難救本美人，閣有對我講過你的山盟海誓哩！著啦，你結婚幾年矣？」伊講話猶原遐爾直接，袂輸熱人的燒風，共我的面hah 甲敢若欲臭焦去。
　　「我猶袂結婚。這世人是注定無人愛矣。」
　　「你敢是傷故謙矣，生甲遐好閣大欉，你喔，我看你是無可能無人愛的。」麗雲使一个伊予愛情的神祕磨練過的目尾看我：「我敢有共你講過，我自細漢就認為你是緣投囡仔？」
　　「妳講真的？」
　　「當然是真的。哈哈哈，我閣聽著你的心咧撲撲跳矣哩。」
　　「真想袂到─我是講，敢講妳嘛猶未……」
　　「佮你仝款啊。才知影這世人是注定無人愛矣，所以才揣你來鬥陣哈哈，這一定是咱一見鍾情的命運！」

最佳賣點

最佳賣點 : 西太平洋正中心
第一島鏈佮第二島鏈之間，一片廣闊的迷航之海
古早華夏佮美日聯盟的兩股力量，混沌踅轉、對接相衝