灶雞仔 Tsàu-ke-à | 誠品線上

灶雞仔 Tsàu-ke-à

內容簡介

內容簡介 伊就親像彼隻宓佇灶跤壁空、柴堆內底，無人注意， 拚命咧叫ê灶雞仔，孤單又閣短暫、苦悶嘛無向望。 對1997年行入台語創作ê路途，府城作家陳正雄以新詩、散文kap小說ê多元手路，開創台語文學ê面腔，得著文學獎、貢獻獎濟濟肯定。 《灶雞仔》是伊短篇小說ê收成，虛構ê筆法，透濫真實ê人生經驗，用活跳媠氣ê台語，寫感動精彩ê故事。小說家ê目神，照看台灣社會kap政治環境ê變化，以及世俗凡人甚至弱勢ê處境。回顧青春少年時，紀錄人生無仝時期ê體悟，面對無常kap命運，寫出性命ê遭遇kap無奈。有笑詼、有溫暖、有悲傷，嘛有目屎。 本冊收錄十篇陳正雄著獎小說作品。〈灶雞仔〉描述主角佮𨑨迌囡仔「灶雞仔」ê友情故事，〈自首〉寫主角細漢時ê譀古意外，〈大俠顧更仔〉咧講1 ê神秘甘蔗人無去ê故事，〈命〉ê主角拄著同窗朋友阿明煞尾發生奇怪ê代誌，抑是〈選舉ê故事〉講選舉ê烏暗面……在地ê氣口，帶鄉土ê氣味，小說家用文字傳承母語，用故事刻畫記持，短篇束結，精選呈現。 ★誠心推薦★ 王秀容（師大台文系博士、教育部本土語言傑出貢獻個人奬、教育部閩南語詞典錄音者） 向陽（國立台北教育大學名譽教授） 朱頭皮（搖滾歐吉桑） 呂東熹（公視台語台台長） 李勤岸（國立中正大學台灣文學與創意應用研究所教授） 阿雞GLOJ（饒舌創作者） 陳明仁（台語文學家） 陳豐惠（李江却台語文教基金會執行長） 廖士賢（息壤音樂總監、音樂創作人） 蔡振南（音樂人） 謝銘佑（台語詞曲創作者） （推薦人依姓名筆劃排序）

作者介紹

作者介紹 陳正雄陳正雄1962年出世台南一中教師退休現任台文筆會理事長早前主要創作台語詩得過幾个文學獎出過幾本台語詩集《灶雞仔》是頭一本ê台語短篇小說集

產品目錄

產品目錄 推薦序 陳正雄—台南ê萬事通先生／陳明仁 灶雞仔 自首 大俠顧更仔 李貴ê戰爭 輔-ê ê秘密 師生 接跤仔 管區ê 命 選舉ê故事

商品規格

試閱文字

內文 : 推薦序 陳正雄—台南ê萬事通先生
陳明仁（台語文學家）

　　英國ê作家William Somerset Maugham，俗稱Mom，漢字寫做毛姆，有一篇出名ê小說叫做《Mr. Know All》，翻譯作「萬事通先生」。講tī遊輪kap 一个人睏kāng房，真煩。無論講siáⁿ，i lóng是專家。人leh討論真珠，i比一个少婦講i ām-kún hit條絕對是貴som som ê真珠，少婦ê翁婿是軍官，kap i相輸 100 kho͘ 美金，萬事通先生koh chim-chiok觀察hit條phoa̍h鍊，看少婦ê面色各樣，當場認輸，hö͘ 人一百kho͘。半暝有人ùi房間門kha tu 一 ê phoe-lông入--來，té 一百 kho͘ 美金。萬事通先生講，in翁去做兵，i少年bó͘ 孤單守空房，加減有人交往，送i高貴ê真珠phoa̍h鍊，騙in翁講是假的養珠，mā正常。
作者kā這位萬事通先生ùi負面轉做正面書寫ê工夫，hö͘人o-ló。
　　陳正雄是台南一中退休ê公民老師，有機會創作台語文學，先寫詩，尾後小說，真有成績。正雄真興讀冊，台灣ê人文歷史讀真透。照我所知，許丙丁《小封神》所寫ê地頭、廟寺tī toh位，i lóng會sái作導覽。葉石濤ê小說kap作品地點，i上了解，王育德、王育霖ê關係事、地，完全清楚。我bat聽過i專題演講，免看資料，kā兩兄弟ê事件、年代、日子介紹明瞭，便若有團體參訪，i ê導chhöa，連文學、歷史、藝文lóng介紹，講是台南ê萬事通，完全tú好niâ。
　　正雄先生ê小說，差不多現場lóng tī台南，主題mā是校園kap台南草地所在ê人士，人物ê描寫，mā會ná像毛姆這樣，kā社會風評無真正面ê老芋仔，各樣gín-á，倒尾塑造到hö͘人感動。我想起日本作家淺田次郎得獎ê短篇小說集《鐵道員》，純文學真gâu寫，這時改寫社會冷派小說系列，kā烏槍建道、軍曹等人物寫到真心適、古chui！正雄兄無hit款社會經歷，mā有才調創作這款身份kap行做無kāng層次ê書寫。
　　前幾年，阮tī台南林森路正雄ê厝--nih有辦文學讀冊會，hit間厝tī鐵支路邊，siuⁿ吵，i無toà hia，我tī台南就睏hit ê所在。台南文兄俊州、定邦、裕凱、李林波等會參加，有時建成、芸明、柏榮mā會來，討論文學書寫ê各種層面，對作家來講，應該是有行氣chiah tio̍h！正雄愛參加文學獎，教育部、台南市、高雄市辦--ê，若有機會，lóng會參加。這本小說集，lóng是得獎作品，有時˜是it著獎金名聲，i想beh愛台南成立王育德紀念館，chhöe機會beh請求市長，若得頭名，會tàng公開發言，為án-ni，i得頭賞，市長soah無來，koh拚後屆，chiah有賴清德出席，有機會成立王育德紀念館。黃昭堂紀念館，i mā tàu爭取。
　　我上愛聽i講有關台南歷史人物ê情物，像湯德章等等。有文學家寫著台南ê所在，i lóng會報我知，地點是這時toh一條街巷幾號。真正ê萬事通先生。我樂意推荐這本小說集！

灶雞仔

　　「灶雞仔」是我讀國民小學ê同窗ê兼好朋友，雖然畢業了後，因為種種ê原因，阮就真少見面矣，毋過，我猶是定定會聽著伊ê消息，想起伊ê代誌。
灶雞仔，當然毋是伊ê本名，其實伊ê老爸有共伊號一个誠體面ê名，叫做「李興華」。對遮，咱會當看出當初時伊ê老爸對伊，應該是有真大ê寄望。
到底伊後來那會號做灶雞仔？是啥人代先叫ê？我嘛毋知影，可能佮伊ê外表有關係。伊人生做細漢細漢、㾪巴㾪巴；面肉黃酸黃酸、頭毛又閣紅芽紅芽，看起來，就是一款營養不良ê模樣。
　　毋過，伊逐工元氣十足、精神百倍，行路總是沿路趒沿路跳，親像草蜢仔仝款。特別是，伊有夠愛呼噓仔，不管去到佗位，做啥代誌，差不多攏會聽著伊ê呼噓仔聲，毋但𠢕呼、又閣好聽。無看-過，實在真oh去想像，伊彼个細細个仔ê喙，那會當變出遐爾濟款無仝ê音樂出-來？彼種聲音，準講已經過去三、四十冬矣，到今，我猶是無法度放袂記。無定著，灶雞仔ê外號，就是因為按呢來ê嘛有可能。
　　佇一般人看來，特別是學校先生佮同窗ê心目中，灶雞仔百面是一个標準ê「歹學生」。
　　伊差不多逐工攏遲到、上課定定咧tuh-ku、三不五時偷逃學、作業毋捌準時交、成績永遠上尾名；猶有，無鉸指甲、無tsah手巾仔衛生紙、無洗身軀無換衫褲……會使講，所有「歹學生」ê條件，伊攏佔齊全。毋才講，有影是揣無人欲佮伊做伙。老師看伊無目地，同學嘛排斥伊，干焦我這个，人講ê「好學生」，顛倒佮伊較有緣。
　　我感覺，伊準講有誠濟問題，毋過，伊袂去kâng騙、袂去kâng偷；毋捌去欺負人、毋捌去傷害人，準講䆀，嘛䆀伊家己爾。
尤其是有一擺，班裡ê惡霸，彼个大箍仔「棺材邦」公開搶我ê物件，我較軟汫又閣無膽，毋敢佮伊輸贏。其他ê同學，有ê激恬恬、有ê準無看，無人敢喝聲、無人敢插手。
　　「物件還人啦！」逐家攏毋敢出面ê時，灶雞仔hiông-hiông徛出來講話。
　　「幹！外省豬仔！你講啥潲？」棺材邦看著灶雞仔竟然敢對伊嗆聲，感覺真意外、口氣誠歹聽，行到面頭前，出手共灶雞仔sak 一下倒siàng-hiànn。
　　「我幹恁娘！」聽著棺材邦先用話糟蹋，閣出手共拍，灶雞仔誶一聲，規个人對棺材邦ê腹肚心挵過去，棺材邦無張持，一箍人tǹg-lap坐佇塗跤。
　　「你該死矣！」棺材邦氣phut-phut，即時peh起來，紲手提一條椅頭仔對灶雞仔ê身軀頂hám落去。
　　灶雞仔人細漢，跤手猛掠，一閃身，顛倒來到棺材邦ê尻川後，跳上伊ê尻脊骿，兩支手像鐵箍共伊ê頷頸束牢咧。
　　棺材邦人大箍、身軀大欉，翻手想欲共灶雞仔giú-落，又閣giú袂落；出力想欲共灶雞仔hiù開，嘛是hiù袂開。不管伊按怎大聲叫、出力，灶雞仔就親像一隻土狗仝款，絚絚咬佇彼隻山豬ê頷頸，無欲放。
　　「幹什麼！」正當棺材邦開始面肉浮青筋、目珠吊白仁，眾人攏驚kah毋知欲按怎ê時陣，老師hiông-hiông傱入來，大力喝一聲，趕緊共兩个giú乎開。兩人先予老師𤆬去辦公室。聽講，一个人先摃十个尻川䫌，紲落來，上課ê時，閣hông罰去跪佇教室頭前，講台ê 兩爿。
　　棺材邦跪佇倒手爿，伊ê人大欉又閣粗勇，規个面臭konn-konn、懊tū-tū，看起來足毋甘願ê樣；灶雞仔跪咧正手爿，伊生做細漢又閣薄板，一箍人無意無意、無神無神，應該是感覺無聊ê款；老師徛佇台仔頂氣phut-phut，一下仔斡頭看兩个，一下仔斡頭看阮逐家，一直罵、一直念……
　　看著這款情形，我無張持想起早前捌佇廟裡，看過ê城隍爺佮邊仔ê七爺、八爺，雖罔ê身材、體格無相仝，毋過彼款氣氛、心情差不多。
　　放學了後，我佮灶雞仔做伙轉去。伊正爿喙䫌小可凝血、兩支手骨幾跡烏青，毋知是去予棺材邦拍著，抑是去予老師摃ê？伊今仔日先佮同學相拍閣予老師體罰，毋過，看起來若像無啥要緊，規路照常跳伊跤步、呼伊噓仔，閣招我禮拜佮伊去掠蟋蟀仔。
　　就按呢，阮兩人變做上好ê朋友。我分伊衛生紙、教伊寫作業，請伊食sì-siù；下課ê時，做伙𨑨迌；放學以後，鬥陣轉去；連歇假，嘛相招四界去löng-liú-lian。
彼擺事件了後，班裡，包含棺材邦在內所有ê同學，就無人閣敢欺負我矣，嘛無人敢佇灶雞仔ê面頭前講伊ê歹話。毋過，當私底下咧鄙相伊「外省豬仔」ê時，我喙裡雖罔毋敢為伊出聲、替伊講話，心內猶是感覺真艱苦、誠毋甘。

最佳賣點

最佳賣點 : 伊就親像彼隻宓佇灶跤壁空、柴堆內底，無人注意，
拚命咧叫ê灶雞仔，孤單又閣短暫、苦悶嘛無向望。